Бугундан Ботир Зокиров номидаги Миллий эстрада санъати институтига кириш имтиҳонлари бошланди
2021/2022-ўқув йили учун кириш тест синовлари 2 сменада ўтказилади:
1️-сменада 10:00 дан 11:00 га қадар;
2️-сменада 12:00 дан 13:00 га қадар.
Тест синовлари бакалавриат таълим йўналишлари учун 3 та фан бўйича олинади. Магистратурага топширадиганлар учун эса чет тили фанидан имтиҳон олинади. Бунда белгиланган фанлар ҳар иккала йўналиш учун ҳам мажбурий ҳисобланади.
Талабгорларга бакалавриат таълим йўналишлари учун мажбурий фанларнинг ҳар биридан 10 тадан, жами 30 та, Магистратура мутахассислиги учун фақат чет тили фанининг ўзидан 30 та тест топшириғи берилади.
Диққат! Имтиҳонга ажратилган вақт жавоблар варақасини бўяш билан биргаликда 1 соатни ташкил этади.
Бакалавриат таълим йўналишлари учун тест синовларида тўплаш мумкин бўлган максимал баҳо 63 балл бўлиб, ҳар бир тоғри жавоб учун 2,1 баллдан берилади. Магистратура мутахассисликлари учун эса максимал натижа 50 баллни ташкил этади.
Эслатма. Ўқиш истагида бўлганлар тест синовида иштирок этиш учун рухсатномани Давлат тест марказининг my.dtm.uz сайтидан онлайн тарзда юклаб олишлари мумкин.
Диққат! Талабгорлар тест синови ўтказиладиган ҳудуд, яъни Давлат тест марказига рухсатномада белгиланган вақтдан кечикмасдан келишлари лозим. Бунда уларнинг қўлларида шахсини тасдиқловчи ҳужжат ва рухсатнома бўлиши зарур.
Аввалроқ Маданий мерос техникумлари ҳамда Эстрада санъати институти ташкил этилиши ҳақида хабар берилганди.
Оламгир Абдиев
