Ўзбекистон давлат қарзи қанчалиги маълум қилинди
Ўзбекистон давлат қарз қолдиғи жорий йилнинг III чорагида 1.1 млрд. долларга ошиб, 1 октябрь ҳолатига 25.3 млрд. долларни ташкил этган.
Бу ҳақда Молия вазирлиги маълумот берди.
Қайд этилишича, давлат қарзининг ЯИМга нисбати барқарорлашиш тенденцияси сақланиб қолган ва йилнинг 1 октябрига нисбатан 38,4 фоизгача пасайган.
Маълумот берилишича, жорий йилнинг июль-сентябрь ойларида давлат қарзи қолдиғининг 1,1 млрд долларга ошиши, асосан, давлат бюджети тақчиллигининг молиялаштирилиши ва инвестицион лойиҳаларнинг амалга оширилиши натижасида қарз маблағларининг ўзлаштирилиши билан бирга, 356,4 млн доллар миқдоридаги давлат қарзининг сўндирилиши билан изоҳланган.
Натижада, жорий йилнинг III чорагида:– Ўзбекистон номидан жалб қилинган ташқи қарз қолдиғи 897,6 млн долларга ошди; – Давлат кафолати остида жалб қилинган ташқи қарз қолдиғи 42,2 млн долларга ошди; – Давлат томонидан кафолатланган ҳамда давлат бюджетидан қайтариладиган ички мажбуриятлар қолдиғи 102,2 млн долларга ошди; – Ўзбекистон номидан 1 196,4 млрд сўмлик давлат қимматли қоғозларини (ДҚҚ) эмиссия қилиниши ва 407,2 млрд сўм миқдоридаги ДҚҚ сўндирилиши натижасида ДҚҚ бўйича қарздорлик қолдиғи 789,2 млрд сўмга ошди.
Муножат Валиева
