Узр-маъзур 5 фоизлик компенсация билан ёпилади

 

“UzAuto Motors” АЖ “Chevrolet Captiva 5” автомобилини етказиб бериш бўйича бекор қилинган шартномаларнинг маблағларини қайтаради ва компенсацияни амалга оширади" - деб ёзади компания.

 

Эслатма. Компания 2021-йилнинг 20 ноябрь санасида “Chevrolet Captiva 5” автомобилларини етказиб бериш бўйича шартномалар тўхтатилгани ҳақида расмий баёнот берган эди.

 

Мазкур баёнотда мижозлар мурожаат қилгандан сўнг 3 кун ичида тузилган шартномалар бўйича тўланган барча маблағлар тўлиқ қайтарилиши ёзилган. Шунингдек, қўшимча равишда олдиндан қилинган тўлов суммасининг 5 фоизи компенсация сифатида тақдим этилиши ҳам ушбу баёнотда келтирилган.

 

Компания маълумотларига кўра, “Chevrolet Captiva 5” автомобили бўйича жами 461 та шартнома пули тўланган.

 

Шундан 207 нафар харидор “Chevrolet Captiva 5” автомобили ўрнига бошқа автомобилни олишга қарор қилган. 161 нафари эса тўланган маблағ қайтарилиши учун “Uzauto”га ариза берган.

 

Компания хабарида ёзилишича, мазкур 161 нафар мурожаатчиларнинг барчаси аллақачон пулларини қайтариб олишган. Жами тўловчиларнинг қолган 41 нафари ҳам ўтган кундан бошлаб компенсация сифатида тақдим этилган 5 фоизлик суммани олиб келмоқда.

 

“Қолган харидорлар ҳам ўз маблағлари ва компенсацияни яқин икки-уч кун ичида олишади”, - дейилади компания хабарида.

 

Аввалроқ “Chevrolet Captiva 5” тўхтатилгани сабаб кўтарилган баҳс-мунозарага депутат Дониёр Ғаниевнинг ечим бергани ҳамда монополист истеъмолчилар ҳуқуқларини бузишда давом этаётгани ҳақида хабар берилганди.

 

Оламгир Абдиев