Гўшт, картошка, ўсимлик ёғи каби маҳсулотлар импортига берилган ҚҚС имтиёзлари яна 4 ойга узайтирилиши мумкин

 

Жорий йил 1 майдан 31 декабргача кунгабоқар ва соя уруғлари ҳамда ўсимлик ёғи импорти, шунингдек ўсимлик ёғини ишлаб чиқариш ва ички бозорда реализация қилиш ҚҚСдан озод этилганди. 

Бундан ташқари, солиқ кодексига киритилган ўзгартиришларга асосан 2021 йил 10 октябрдан жорий йил охиригача гўшт (мол, қўй, товуқ), тирик ҳайвонлар (қорамол ва парранда) ва уларни сўйишдан олинган маҳсулотларни, картошка ҳамда музлатилган балиқни реализация қилиш бўйича айланма, шунингдек, уларни Ўзбекистон Республикаси ҳудудига олиб кириш ҳам ҚҚС озод қилинган эди. 

 

Парламентга Ҳукумат томонидан киритилган қонун лойиҳасида жорий йил охиригича берилган имтиёзлар муддати яна 4 ой муддатга чўзилиши назарда тутилмода. 

 

Ушбу қонун лойиҳасига кўра, 2022 йил 30 апрелга қадар қуйидагилар ҚҚСдан озод қилинади:

1) Ўзбекистон Республикаси ҳудудига ўсимлик ёғи, кунгабоқар ва зиғир уруғи, шунингдек соя данагини олиб кириш;

2)  ўсимлик ёғини (пахта ёғидан ташқари) ишлаб чиқариш ва (ёки) реализация қилиш бўйича айланма;

3) гўшт (мол, қўй, товуқ), тирик ҳайвонлар (қорамол ва парранда) ва уларни сўйишдан олинган маҳсулотларни, картошкани ҳамда музлатилган балиқни реализация қилиш бўйича айланма, шунингдек уларни мамлакат ҳудудига олиб кириш.

 

Аввалроқ Президент ҚҚС маъмуриятчилигини такомиллаштириш тўғрисида қарор имзолагани ҳақида хабар берилганди.