"Замминистрнинг иккинчи хотини" яна трендда

 

Бугун ижтимоий тармоқларда «Вторая жена замминистра» деб номланган МЧЖ ташкил этилгани ҳақида хабарлар тарқалди. Статистика қўмитасининг сайтида ҳам шу номда кийим-кечак савдоси билан шуғулланувчи МЧЖ ҳақида маълумотлар мавжуд. 

 

Ушбу МЧЖ жорий йилнинг август ойида Тошкент шаҳрида ўтказилган тунги рейдларнинг бирида ўзини «замминистр»нинг иккинчи хотини эканини айтиб ЙПХ ходимларининг қонуний талабларига бўйсунмаган актриса Мадина Эшонқуловага тегишли экани маълум бўлди.

 

Маълумотларга кўра, МЧЖ 2021 йил 29 сентябрда рўйхатдан ўтган. «Orginfo.uz» сайтида бу МЧЖ номи «Paido low calarie drink» сифатида берилган. Актриса МЧЖ номини кеча, 22 декабрь куни ўзгартирган. 

 

Давлат хизматлари агентлиги ушбу ҳолатга муносабат билдириб ном қайта ўзгартирилганини маълум қилди.

 

«Муҳокамаларга сабаб бўлаётган тадбиркор аслида бошқа ном остида рўйхатдан ўтказилган бўлиб, 2021 йилнинг 22 декабрь куни Зангиота тумани Давлат хизматлари маркази орқали қайта рўйхатдан ўтказилган ва номини ўзгартирган. Муҳокамага сабаб бўлган тадбиркорлик субъектининг фирма номи, тадбиркор билан олиб борилган тушунтиришлардан сўнг белгиланган тартибда ўзгартирилди», – дейилади агентлик хабарида.