Тошкентда эркак ов милтиғи билан ҳайвонларни отди

 

“Меҳр ва Оқибат” ННТ сайтида ов милтиғи кўтарган эркак уйдан чиқиб, номаълум томонга қараб кетаётгани акс этган видеолавҳа жойлаштирилди. Унда айтилишича, Миробод туманида фуқаро ушбу қурол ёрдамида кўчадаги кучук ва итларни отган.

 

Биз “Меҳр ва Оқибат” нодавлат нотижорат ташкилоти ходими билан боғландик. Унинг айтишича, 4 февраль куни ташкилот номига фуқаро М.Н ариза билан мурожаат қилиб, мушуги кундузги 11:30 ларда уйга ов қуролидан яраланган ҳолда қайтган. Шундан сўнг у дарҳол Ветеринария клиникасига мурожаат қилган. Операция давомида мушук танасидан ов милитиғининг ўқи топилган.

 

Орадан маълум вақт ўтгач, аризачи қўшниси А.И қўлида қурол кўтарган ҳолда уйдан чиқиб, кучук ва мушукларни мўлжалга олаётганини кўрган. Буни сабабини билиш учун А.И.га телефон қилган. Телефон суҳбатида А.И ҳақиқатан ҳам мушук ва итларга ўқ узганини тан олган.

 

Ҳайвонларни муҳофаза қилиш ҳамжамияти эркакнинг ов қуроли билан кўчада юргани акс этган видеони расмий сайтига жойлаган.

 

“Меҳр ва Оқибат” ННТ ҳолат юзасидан бугун Тошкент шаҳар ИИББга текширув ўтказиб, чора кўрилишини сўраб, ариза билан мурожаат қилган.