Навоийда янги табиат боғи ва қўриқхона пайдо бўлади
Вилоятнинг Учқудуқ ва Томди туманларида янги табиий ҳудудлар ташкил этилади.
Бу ҳақда "Экология ва атроф-муҳитни муҳофаза қилиш давлат қўмитаси тизимида муҳофаза этиладиган табиий ҳудудларни шакллантириш чора-тадбирлари тўғрисида" Президент қарори имзоланди.
Унга мувофиқ, Экология давлат қўмитаси тасарруфида Навоий вилоятининг Учқудуқ туманида умумий майдони 1,2 минг гектар "Марказий Қизилқум" миллий табиат боғи пайдо бўлади. Томди туманида эса умумий майдони 40 минг гектар бўлган "Ақтау-Томди" қўриқхонасини ташкил этилади.
Қарорда, шунингдек, "Марказий Қизилқум" миллий табиат боғининг хўжалик фойдаланишдаги ерлари ушбу ҳудудларда жойлашган ердан фойдаланувчилар ва ижарачилар ихтиёрида қолиши белгиланди.
Жорий йилда боғ ва қўриқхонани молиялаштириш Экология давлат қўмитасининг Экология, атроф-муҳитни муҳофаза қилиш ва чиқиндиларни бошқариш жамғармаси ҳисобидан, 2023 йилдан бошлаб Навоий вилояти маҳаллий бюджети, Экология жамғармаси маблағлари ва бошқа манбалар ҳисобидан молиялаштирилиши режалаштирилган.
Эслатиб ўтамиз, аввалроқ Экология соҳасида жавобгарликни кучайтириш нуқтаи назаридан амалдаги қонунлар қайта кўриб чиқилиши ҳақида хабар берилганди.
