Интизомий меъёрларга амал қиламаган банк ходимлари жарима тўлади
Истеъмолчилар ҳуқуқларини бузган 466 нафар банк ходимидан 829 миллион сўм миқдорда жарима ундирилган.
Марказий банк департаментининг хабарига кўра, истеъмолчилар ҳуқуқларини ҳимоя қилиш борасидаги ишлар жадал олиб борилмоқда:
Ўтказилган ўрганишлар ва назорат тадбирлари натижасига кўра, хизмат кўрсатишда истеъмолчиларининг ҳуқуқлари бузилишига йўл қўйган 16 та тижорат банки ва 8 та микрокредит ташкилотидан жами 1 177 миллион сўм миқдорида жарималар ундирилди.
Банкларга нисбатан кўрилган чоралар таъсирчанлигини ошириш мақсадида ундирилган жарималарнинг 829 миллион сўми ёки 70 фоизи қоидабузарликлар йўл қўйилишига сабабчи бўлган банкларнинг 466 нафар масъул ходимлари ҳисобидан қопланди.
Шу билан бирга, тижорат банклари томонидан қоидабузарликларга йўл қўйган 269 нафар ходимларига нисбатан интизомий жазо чоралари қўлланилган.
Эслатиб ўтамиз, аввалроқ фуқароларга имтиёзли кредит олиб беришни ваъда қилган фирибгар ушлангани ҳамда Миришкорда банк ходимлари аралашган ноқонуний "ўйин" фош этилгани ҳақида хабар берилганди.
