Самарқандда “Ҳизб ут-Таҳрир” террористик ташкилот тарафдорлари аниқланди
Улар мунтазам равишда ташкилот ғоялари сингдирилган материалларни интернет тармоғи орқали тарқатиб келган.
Давлат хавфсизлик хизмати Самарқанд вилояти бошқармаси вилоят ИИБ билан ҳамкорликда тезкор тадбир ўтказилди. Унга кўра, Паст Дарғом туманида яшовчи “А.О.” бошчилигидаги 8 нафар маҳаллий фуқаролар ижтимоий тармоқларда виртуал халқа тузиб, “Ҳизб ут-Таҳрир” террористик ташкилоти ғоялари билан йўғрилган материалларни мунтазам равишда тарқатиб, муҳокама қилиб келганликлари аниқланди.
Маълум бўлишича, мазкур гуруҳ етакчиси “А.О.” Интернет тармоғи орқали “Ҳизб ут-Таҳрир” террористик ташкилоти ғоявий раҳномаларидан бири 1980 йилда туғилган, Қирғизистон фуқароси М.Х. билан алоқа боғлаб, унинг кўрсатмалари асосида фаолият олиб бораётган бўлган.
Уларга нисбатан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, аввалроқ "Ҳизб-ут Таҳрир"нинг ўзбекистонлик етакчиси қўлга олингани ҳамда Жиззах вилоятида "Ҳизб ут-Таҳрир ал-Исломи" халқаро террорчилик гуруҳи вакиллари қўлга олингани ҳақида хабар берилганди.
