Наманганда МФЙ раиси тадбиркорни чув туширди
У фуқаронинг 118 миллион пулини ўзлаштирган.
Бу ҳақда Бош прокуратура ҳузуридаги Департамент хабар бермоқда.
Маълум қилинишича, Департаментнинг Чуст туман бўлими томонидан тадбиркорлик субъектларининг ҳуқуқларини ҳимоя қилиш юзасидан терговга қадар текширув ўтказилди.
Унда тумандаги “Ю.” МФЙ раиси Б.С. “G.B.” МЧЖ раҳбари Ғ.нинг “Соғломлаштириш ва спорт маркази” қуриш ниятида юрганини билиб, унга қурилиш ишлари учун 475 миллион сўм субсидия маблағини олиб беришини айтиб, гўёки “G.B.” МЧЖни субсидия олувчи тадбиркорлик субъектлари рўйхатига киритилганлиги ҳақида сохта маълумот киритилган ҳужжатни тақдим этган.
Тадбиркор Ғюнинг ишончига кирган МФЙ раиси унинг 118 миллион сўмини фирибгарлик йўли билан қўлга киритганлиги аниқланган.
Мазкур ҳолат юзасидан Жиноят кодексининг 168-моддаси (фирибгарлик) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
