Россия "Eurovision" — 2022”да иштирок этмайди
Ушбу чеклов россиялик хонандалар билан бир қаторда мусиқий гуруҳларга ҳам тегишли.
“Eurovision” ташкилотчилари Россия номзодлари бу йилги танловда иштирок этмасликларини маълум қилишди.
“Украинадаги мисли кўрилмаган инқироздан келиб чиқиб, бу йили россиялик номзодларнинг иштироки танловнинг обрўсига путур етказишидан хавотирдамиз”, дейилади ташкилотчилар томонидан берилган расмий баёнотда.
Россиянинг танловдаги иштирокини чеклаш таклифи Финландиянинг “Yle” телерадиокомпанияси томонидан берилган. Шунингдек, финландиялик ижодкорлар агар танловда Россия номзоди қатнашадиган бўлса, Финландия иштирок этишдан бош тортишини маълум қилган.
Эстониянинг “ERR” миллий телерадиокомпанияси ҳам айнан мана шундай позицияда эканлигини билдирган.
“Eurovision” танлови 1956-йилдан бери ҳар йили ўтказиб келинади. 2015 йилда иштирокчилар рўйхатига Австралия ҳам қўшилган. 2022-йилда танловнинг финал босқичи Турин шаҳрида бўлиб ўтади.
