Япониялик олимлар Андижон музейига ташриф буюрди
Шунингдек, томонлар ҳамкорлик учун дўстлик меморандумини имзолашга келишиб олди.
Андижон музейида Япониянинг Канадзава университети Қадимий цивилизациялар ва маданий ресурслари маркази ҳамда Токио университетининг археолог олимлари Шого Куме ва Саижи Араи, ЎзФА Археологик тадқиқотлар институти археологи Ҳикматулло Ҳошимов томонидан ўрганиш ишлари олиб борилди.
Тадқиқотчилар 2018-йилда Андижон вилоятида олиб бораётган тадқиқотлари доирасида Андижон музейига ташриф буюриб, музей маъмурияти билан ҳамкорликда илмий-тадқиқотлар олиб бориш юзасидан бир қанча лойиҳалар устида суҳбатлашган эди.
Бу йилги ташрифда тадқиқотчилар Андижон вилоят тарихи ва маданияти давлат музейи ва Самарқанд Археология институти ҳамкорлигида олиб борилган тадқиқот натижаларига катта қизиқиш билдириб, тадқиқотларда топилган артефактлар билан танишди.
Суҳбат давомида Андижон музейида японияликларнинг илғор тажрибаларидан фойдаланган ҳолда замон талабларига жавоб берувчи фонд лабораториясини ташкил этиш масалалари муҳокама қилинди.
