Пойтахт кўчаларидан бирига Туркия президенти номи берилади
Мазкур ном остидаги кўча аввал ҳам бўлган, у 2011 йилда Зарафшон кўчаси деб номланган.
1 март куни Тошкент шаҳар ҳокими Жаҳонгир Ортиқхўжаев Туркиянинг Ўзбекистондаги фавқулодда ва мухтор Элчиси Олган Бекар билан учрашди, дея хабар берди ҳокимлик матбуот хизмати.
Олган Бекар Тошкент шаҳар ҳокимига қабул учун миннатдорлик билдириб, ўзбек-турк муносабатлари жадал ривожланаётганини таъкидлади.
Маълумотда айтилишича, март ойининг охирида бўлиб ўтадиган II стратегик ҳамкорлик бўйича саммит доирасида Туркия президенти Ражаб Тоййиб Эрдўған Ўзбекистонга ташриф буюриши кутилмоқда.
Шу билан бирга, тарафлар Турк мактабини кенгайтириш учун ер майдонини ажратиш, Туркиянинг биринчи президенти Мустафо Камол Отатурк номини Тошкент кўчаларидан бирига бериш ва Тошкентда қурилиш билан шуғулланаётган турк компанияларининг масалаларини муҳокама этди.
Жаҳонгир Ортиқхўжаев ушбу масалаларнинг ечимида имкон қадар кўмак беришга тайёрлигини билдирган. "Олган Бекар ҳам, ўз навбатида, ҳамкорлик алоқаларини ривожлантириш учун бор имкониятларни ишга солишни ваъда берди", — дейилади маълумотда.
Маълумот учун: Тошкентда Мустафо Камол Отатурк кўчаси аввал ҳам бўлган. Миробод ва Юнусобод туманларида жойлашган Мустафо Камол Отатурк кўчаси 2011 йилда Зарафшонга — кўчадаги туташ ҳудудда жойлашган савдо-кўнгилочар мажмуаси номи билан ўзгартирилганди.
