Хитой ҳеч қачон Тайвань мустақиллигига чидаб турмаслигини маълум қилди
Шунингдек, дунёда ягона Хитой давлати борлиги таъкидланган.
Хитой ҳеч қачон Тайвань мустақиллигига йўл қўймайди. Бу ҳақда мамлакат мудофаа вазирлиги расмий вакили У Цянь маълум қилди.
“Биз "бир давлат – икки тизим” тамойили асосида тинч бирлашиш тарафдори бўлиб қоляпмиз. Тайвань бўғозининг икки қирғоғи тинч асосда бирлашиши учун бор кучимизни ишга оламиз. Аммо биз ҳеч қачон "Тайвань" мустақиллигига ҳаракат қилаётган айирмачи кучларнинг хатти-ҳаракатларига чидаб тура олмаймиз", – деган у.
У Цянь дунёда ягона Хитой борлигини, Тайвань эса унинг ажралмас қисми эканини таъкидлаган. Унинг сўзларига кўра, бу масала Хитойнинг ички муаммоси ҳисобланади ва унга чет давлатлар аралашуви мақбул эмас. “АҚШ ва Япония Тайвань масаласида қанчалик шовқин кўтарса, биз давлат суверенитети ва ҳудудий яхлитлиги йўлида янада қатъий ҳаракат қиламиз”, – деб қўшимча қилган расмий вакил.
Маълумот ўрнида: Тайвань 1949 йилдан буён амалда ХХРдан мустақил сиёсат олиб боради. У Хитойнинг ажралмас қисми эканини бутун дунё, жумладан, АҚШ ҳам тан олади. Шу билан бирга аксарият давлатлар Тайваннинг Хитой таркибига зўравонликсиз ва куч ишлатишсиз қайтиши зарурлигини таъкидлаб келади.
Эслатиб ўтамиз, аввалроқ Хитой ТИВ АҚШ билан Пекин ўртасида очиқ қарама-қаршилик вужудга келиши мумкинлиги тўғрисида маълум қилганди.
