АҚШ сенаторлари Россияни Интерполдан “ҳайдалиши”ни талаб қилди
Бу борада улар Байденга мурожаат билан чиққан.
Европадаги хавфсизлик ва ҳамкорлик бўйича Америка комиссияси Жозеф Байдендан Россияни Интерпол аъзолигидан маҳрум қилишни сўради.
Бу ҳақда “РИА Новости” хабар берди.
Комиссия Энтони Блинкен ва АҚШ бош прокурори Меррик Гарландга шу мазмунда мактуб жўнатган. Унда Жозеф Байдендан Москвани Интерпол аъзолигидан маҳрум қилиш сўралган. Европадаги хавфсизлик ва ҳамкорлик бўйича Америка комиссияси таркибига АҚШ конгрессининг вакиллар палатаси ва сенат аъзолари киради.
Маълумот ўрнида: 24 февраль куни Россия Украинага қарши ҳарбий операция бошлагач, уни Интерполдан чиқариш бўйича бир қанча чақириқлар бўлди. 10 март куни Интерпол бу бўйича баёнот бериб, Москва билан ҳамкорлик сақланиб қолишини, аммо унинг таклифларини кўриб чиқиш бўйича алоҳида жараён ишлаб чиқилишини маълум қилган.
Эслатиб ўтамиз, аввалроқ Байден Россия Украинада мувафаққият қозона олмаслигини айтганди.
