Россияга қарши иқтисодий уруш кетмоқда — Сергей Рябков
РФ ташқи ишлар вазири ўринбосари АҚШ санкциялари Украинадаги урушга боғлиқ эмаслигини очиқлади.
Россияга қарши санкциялар ҳар қандай шароитда жорий қилинган бўлар эди. Бу ҳақда РФ ташқи ишлар вазири ўринбосари Сергей Рябков маълум қилди.
“Амеркаликларнинг бизга зарар етказишини билардик. Ҳозирда кузатилаётган вазиятга олдиндан тайёрланган эдик. У (Украинадаги) махсус операцияга алоқадор эмас”, – деган дипломат.
Унинг фикрича, Киевга қарши ҳарбий амалиёт ўтказилмаган тақдирда ҳам Вашингтон чекловлар жорий этиш учун баҳона топган бўлар эди.
Шунингдек, Рябков Қўшма Штатлар Россияга қарши иқтисодий уруш эълон қилганини таъкидлади.
“Ғарб барча ниқобларни ташлади. РФга қарши очиқ иқтисодий уруш эълон қилинган”, – деб қайд этди у.
Эслатиб ўтамиз, аввалроқ Беларусь мудофаа вазирлиги Украина мамлакатдаги вазият устидан назоратни йўқотганини маълум қилганди.
