Бразилия Россия билан атом сувости кемаси қуриши мумкин
Жаир Болсонару бу ҳақда Путин билан гаплашган.
Бразилия президенти Жаир Болсонару Россиядан сувости кемалари бўйича ёрдам сўраган. Бу ҳақда Folha de São Paulo газетаси хабар берди.
Гап атом сувости кемаси ҳақида бормоқда. Болсонару ушбу масала бўйича шахсан Путинга илтимос билан чиққан. Ўтган ойдаги Бразилия президентининг Москвага ташрифи давомида сувости кемалари муаммоси ҳам муҳокама қилинган.
"АҚШнинг Бразилияга атом сувости кемалари лойиҳасида ёрдам беришни инкор қилиши Болсонаруни Путинга мурожаат қилишига сабаб бўлди", — дейилади хабарда.
Ушбу йўналишдаги муаммолардан бири фойдаланиладиган ёқилғи сертификацияси билан боғлиқ. Бундан ташқари, 2021 йилда Бразилия ҳарбий-денгиз кучлари ядроли қурилмаларни синовдан ўтказган, бу ерда ҳам Россия тажрибаси қўл келиши мумкин.
Эслатиб ўтамиз, аввалроқ Жаир Болсонару Украина масаласига муносабат билдирганди.
