Самарқандда тендер савдоларидан 578 миллион 893 минг сўм тежаб қолинган

 

Самарқанд вилояти бўйича тендер савдоларига эълонга берилган 81 та объектларнинг лойиҳа-смета ҳужжатлари ўрганилганда, дастурга киритилган 40 та умумтаълим мактабларининг лойиҳа-смета ҳужжатларидан 211 млн. 779 минг сўм, 20 та мактабгача таълим ташкилотларининг лойиҳа-смета ҳужжатларидан 126 млн. 555 минг сўм, 13 та ирригация ва мелиорация объектларидан 240 млн. 559 минг сўм, жами 578 млн. 893 минг сўм иқтисод қилинган.

 

Бу ҳақида Самарқанд вилоят прокурори Жаҳонгир Ҳотамов халқ депутатлари Самарқанд вилояти Кенгашининг олтмишинчи сессиясида маълум қилди.

 

Бундан ташқари, Пайариқ туманидаги 59-сонли умумтаълим мактабини реконструкция қилиш бўйича “Сам кадастр” МЧЖ томонидан 1 млрд. 420,4 млн. сўмга ишлаб чиқилган лойиҳа-смета ҳужжатларида ораёпма плиталар сони ошириб кўрсатилиши натижасида объект қиймати сунъий равишда 119,7 млн. сўмга ошириб кўрсатилганлиги аниқланган.

 

Ургут туманидаги 121-мактабнинг фасад қисми сувоқ ишларида 145 млн. сўм, 81-мактабда нархларни ошириб кўрсатиш орқали 47 млн. сўм ва Каттақўрғон шаҳридаги 11-мактабни реконструкция қилиш объекти сметасида материал харажатларига 206 млн. сўм ортиқча кўрсатилганлиги аниқланиб, ушбу ҳолатлар юзасидан Ургут туман ва Каттақўрғон шаҳар прокуратуралари томонидан терговга қадар текширув ҳаракатлари олиб борилмоқда.

 

Лойиҳа-смета ҳужжатларига масъулларнинг жавобгарлик масаласи Департаментнинг вилоят бошқармаси томонидан кўриб чиқилмоқда ҳамда Пайариқ туманидаги 59-мактаб ва Каттақўрғон шаҳридаги 11-мактабни тендер савдоларидан қайтариб, лойиҳа-смета ҳужжатларини тўғрилаб, қайтадан эълонга бериш чоралари кўрилмоқда, дейди вилоят прокурори Жаҳонгир Ҳотамов.