Метро поездига ўзини ташламоқчи бўлган йигит таниш қизидан аразда бўлган
Йигит ўзига таниш бўлган қиз билан ўзаро муаммоси борлиги туфайли гап талашиб, келиша олмаганидан сўнг ўзини электропоезд тагига ташлаган.
Тошкент метрополитенининг Пушкин бекатида 20 ёшли йигит қасддан поезд йўлагига ўзини ташлагани ҳақида хабар берилганди. Бош прокуратура матбуот котиби ҳолат юзасидан қўшимча маълумот берди.
Маълум бўлишича, 14 апрел куни соат тахминан 17:30 ларда Пушкин метро бекатида 20 ёшли эркак қиз дўсти билан гап талашиб, келиша олмаган. Бундан сўнг у ўзини электропоезд тагига ташлаган.
Фуқаро тез тиббий ёрдам ходимлари томонидан кўрикдан ўтказилганида, унга ҳеч қандай тан жароҳати етказилмаганлиги аниқланган. Ҳолат юзасидан терговга қадар текширув ҳаракатлари ўтказилмоқда.
Эслатиб ўтамиз аввалроқ, Тошкент метросида 24 февраль куни эркак ўзини поезд тагига ташлаб вафот этгани ҳақида хабар берилганди.
