Туркия соғлиқни сақлаш туризми секторининг даромади 10 млрд доллардан ошди
Туркияда даволаниш кўплаб мамлакатларда, айниқса, Европа Иттифоқи аҳолиси орасида жуда машҳур.
Бу ҳақда Анталия халқаро соғлиқни сақлаш туризми ва таълим ассоциацияси (UASTED) раҳбари Мехмет Канполат маълум қилди. Канполат мамлакат соғлиқни сақлаш туризми сектори даромадининг Президент Режеп Таййип Эрдоған томонидан 2023 йил учун белгиланган мақсаддан ошиб кетганини айтди.
«Бу соҳанинг даромади йилига 10 млрд доллардан ошди», – деди UASTED раҳбари.
Ташкилот раҳбарининг айтишича, хорижликлар Туркияга асосан тиш даволаш, онкология ва эстетик жарроҳлик учун келади. Шунингдек, сўнгги йилларда Туркияда туркий тилли давлатлардан беморлар сони кўпайганини таъкидлади.
«Жаҳон соғлиқни сақлаш туризми бозори 100 миллиард долларга этади. Сўнгги ўн йилликдаги сармоялар туфайли Туркия соғломлаштириш туризми соҳасида кучли бешликка кирди», — деди Канполат.
Шу билан бирга, у Украинада уруш бошланганидан бери Россиядан Туркиядаги тиббиёт муассасаларига келаётган беморлар сони ортганини қайд этди.
«Ишончим комилки, Россия ва Украина ўртасидаги уруш тугаганидан сўнг ушбу давлат фуқароларининг Туркияда даволанишга қизиқиши ортади», — деди UASTED раҳбари.
