Мирободлик оналар қизларига мактаб психологи номақбул ҳаракатлар қилганидан арз қилди

 

Тошкент шаҳридаги 158-мактаб ўқувчиларининг ота-оналари Nemolchi.uz таҳририятига мурожаат қилиб, мактаб психологи А.Э. уларнинг қизларига нисбатан номақбул хатти-ҳаракатлар содир этганини маълум қилишди.

 

Қайд этилишича, ўқувчилар ота-оналарига психолог уларни тез-тез дарсдан олиб қолишини, ўз хонасида интим характердаги суратларни кўрсатишини ва қизларнинг танасининг турли қисмларини силашини айтишган.

 

“У қизларнинг турли жойларини ушлаб олар, силар ва ҳатто интим жойларини силаган. Ота-оналарга ҳеч нарса айтмасликни таъкидлаган. Қизим психолог 3-синфнинг кўплаб қизларига шундай хатти-ҳаракатлар қилгани, лекин улар ота-оналарга айтишга қўрқишларини айтди. Айрим ота-оналарнинг рақамларини билганим учун уларга дарҳол қўнғироқ қилдим. Бу рост экани аён бўлди. Айрим ота-оналар эса бундан ҳамон хабарсиз”, - дея ота-оналардан бирининг сўзларини келтиради Nemolchi.uz лойиҳаси.

 

Ҳуқуқий ёрдам сўраб ўқувчиларнинг камида 5 нафар ота-онаси ҳуқуқ-тартибот идораларига мурожаат қилган. Маълумотларга кўра, мактаб раҳбарияти ошкораликка йўл қўймаслик учун ўқитувчини ўз хоҳишига кўра ишдан бўшатишган. Ота-оналарнинг сўзларига кўра, А.Э. руҳий касалликлар шифохонасига кўрикдан ўтказиш учун жойлаштирилгани маълум бўлди.

 

Жароҳатланган болалар суд-тиббий экспертизадан ўтказилди.

 

Nemolchi.uz лойиҳаси ушбу масала бўйича Ички ишлар, Адлия вазирликлари ва бошқа органларга мурожаат қилган.

 

Ҳодиса тафсилотлари ўрганилмоқда.