Ўзбекистон делегацияси Арабистонга жўнаб кетди
Улар "Ҳаж - 2022" масаласини ҳал қилиш мақсадида мамлакатга йўл олган
Пандемия ўтган икки йил давомида бутун дунё мусулмонлари ҳаж амалларини адо этиши учун тўсқинлик қилди. Жорий йилнинг январь ойидан бошлаб эса Умра зиёратига бориш қайта йўлга қўйилиб, қисқа вақт ичида қарийб 35 минг нафар ўзбекистонлик умра амалларини бажариш бахтига муяссар бўлишди.
2022 йил муқаддас Ҳаж амалларини бажариш учун ҳам имконият пайдо бўлди. Бу ҳақда Ўзбекистон мусулмонлари идораси хабар берди. Шунингдек, бугун, 3 май куни эрта тонгда идора раиси, муфтий Нуриддин домла ҳазратлари ва Дин ишлари бўйича қўмита раиси Содиқжон Тошбоев бошчилигидаги Ўзбекистон делегацияси Саудия Арабистонига жўнаб кетди.
Саудия Aрабистони Ҳаж ва умра вазирлигининг “Ҳаж – 2022” мавсуми бўйича расмий баёнотида, бу йилги ҳаж тадбирига чет эллик ва маҳаллий ҳожиларга жами 1 миллион киши учун ҳаж ибодатини амалга оширишга рухсат берилади.
Маълум бўлишича, делегация мазкур сафар орқали “Ҳаж – 2022” мавсумини ташкил этиш билан боғлиқ бўлган масалаларни Саудия Aрабистонидаги мутасадди идоралар билан келишишни режалаштирган.
Айни кунларда юртимиз мўмин-мусулмонлари катта интиқлик билан ҳаж мавсуми бошланишини кутишмоқда. Умид қиламизки, юртимиз мусулмонлари яна эмин-эркин ҳаж ибодатларини адо этиш саодатига эришадилар, инша Аллоҳ, дейилади хабарда.
