3 май куни бутун дунёда, жумладан, мамлакатимизда “Жаҳон матбуоти эркинлиги куни” кенг нишонланди

 

Бугунги кунда телеканалда 500 дан зиёд ижодий ва техник ходим ўз иш ўрнига эга бўлиб, 24 соат узлуксиз равишда телемаҳсулотларни эфирга узатиб келяпти. Кўрсатув ва лойиҳалар тайёрлаш, уларга давлат ва жамоат ташкилотлари вакилларини жалб қилиш, содир бўлган воқеа-ҳодисага тезкорлик билан муносабат билдиришда амалий ҳамкорлик йўлга қўйилган.

 

Албатта, телеканалимизда ишлаётган ҳар бир журналистнинг ўз фикри ва қарашлари мавжуд. Шу ўринда, Қалампир.уз интернет нашри томонидан эълон қилинган “Ўрага сичқон тушди, гулдур-гуп ёхуд “ошкоралик ниқоби” ортидаги “шеп”лар” номли мақолада “Севимли” телеканали ходимлари томонидан билдирган фикрлар телеканалнинг умумий фаолияти ва позициясидан келиб чиқиб айтилган гаплар эмас. Хусусан “Замон” информацион дастури бошловчиси Жаҳонгир Олимовнинг Бош прокуратура матбуот хизмати ҳақида билдирган фикрлари телеканал нуқтаи назарини ифода этмайди. Бу журналистнинг шахсий мулоҳазалари.

 

Шу вақтга қадар телеканалнинг 25 дан ортиқ кўрсатув ва лойиҳаларини, жумладан, “Замон” информацион дастурини тайёрлаш жараёнида маълумот олиш билан боғлиқ бирор жиддий муаммога дуч келингани йўқ.

 

Биргина мисол: 2022 йилнинг январь-апрель ойларида Ўзбекистон Республикаси Бош прокуратураси тизимидаги ташкилотлар ёрдамида 359 та материал тайёрлаб эфирга узатилган. Мана шу рақамнинг ўзи ҳам прокуратура органлари ОАВ учун очиқ эканлигини кўрсатиб турибди. Нафақат Бош прокуратура, шу билан бирга, ҳуқуқни муҳофаза қилувчи барча идоралар матбуот хизматлари билан мустаҳкам ва кенг кўламли алоқалар йўлга қўйилган. Фурсатдан фойдаланиб, “Севимли” телеканали раҳбарияти ҳамкорлик учун барча матбуот хизматларига миннатдорлик билдиради ва уларни яна бир бор байрам билан қутлайди.

 

“Севимли” телеканали матбуот хизмати