Пекинда эпидемиологик вазият оғирлашгани маълум қилинди
Якшанба куни Хитой пойтахтида юзга яқин коронавирус ҳолатлари аниқланди.
22 майда Хитой пойтахтида 99 коронавирус ҳолатлари аниқланди. Бу ҳақда Пекин маъмурияти маълумот берди.
Уларнинг 83 нафари тасдиқланган ва 16 нафари симптомсиз ҳолатлар бўлган. Бу шанба кунга нисбатан анчага кўп. 21 май куни шаҳарда 52 та коронавирус билан касалланиш ҳолати аниқланганди.
Якшанба куни Пекин маъмуриятининг расмий вакили Сюй Хэцзянь шаҳарда оғир эпидемиологик вазият шаклланганини маълум қилган. Шу муносабат билан у масофавий иш тартибини сақлаб қолишга чақирган.
Ҳозирда Хитой пойтахтида кўнгилочар муассасалар фаолияти тўхтатилган. Овқатланиш муассасаларида фақат етказиб бериш хизматлари йўлга қўйилган.
Аввалроқ Пекинда метро фаолияти тўхтатилгани тўғрисида хабар берилганди.
