"Туманлардаги тиббиёт бирлашмалари фақатгина «ажал бекати» эканлиги намоён бўлмоқда"
Шоир ва ёзувчи Муҳаммад Исмоилнинг ўғли Тошкент вилояти ҳокимлиги ахборот хизмати бош мутахассиси Асқар Исмоилов укасининг автоҳалокатга учрагани ва унга зарур ёрдам кўрсатилмаётганини айтди.
Таниқли шоир ва ёзувчи Муҳаммад Исмоилнинг ўғлини 8 июнь куни Оҳангаронда, пиёдалар ўтиш йўлагида машина уриб кетгани ҳақида хабарлар тарқалди.
Аввалроқ у автоҳалокат сабабини айтиб, ўғлини 5 кундан бери Оҳангарон шифохонасидан Тошкент шаҳридаги Республика шошилинч тез тиббий ёрдам марказига олиб келолмаётганини маълум қилганди.
Ёзувчининг яна бир ўғли Тошкент вилояти ҳокимлиги ахборот хизмати бош мутахассиси Асқар Исмоилов укасига зарур бўлган ёрдам ҳалигача кўрсатилмаётганини таъкидлади.
“Шунча йил Тошкент вилоятида ишлаб тиббиёт соҳасида бўлаётган ўзгариш ва ислоҳотлар ҳақида бўш аравани қуруқ олиб қочганлигимиз-у, баланд парвоз гаплардан уёғига ўтмаганимиз ўзимга келганда душманлик қилишини ҳечам ўйлаб кўрмаган эканман.
Укамнинг ажал оғзида ётганига ҳам бугун 7-кун бўлди. Оҳангарон Тиббиёт бирлашмасига олиб келганимизда ҳуши ўзидалиги ва ҳамма билан гаплашгани кўз олдимда. Наҳот соғлиқни сақлаш соҳаси бу даражада жарлик томон қулаган бўлса... Бу даражада кетса, яна қанча инсонлар азият чекиши мумкин.”, – дейди у.
Асқар Исмоилов укаси жароҳат олгандан (оёқ қисми сингандан) сўнг узоғи 6 соат ичида жарроҳлик амалиёти ўтказиш кераклигини билгач, шу заҳоти Тошкентга мурожаат қилади ва малакали мутахассисларни чақириш кераклигини айтади. Улар эса ҳаммаси жойидалигини айтиб, бу унчалик жиддий шикаст эмаслиги ва шу ернинг ўзида хамма чоралар кўрилаётганига акани ишонтиришади.
“Минг афсуски, туман шифокорларининг имконияти шу экан – ваъдалар экан”, – дейди у. “Вақт бой берилди, фақат оғриқ қолдирувчи дори бериб таваккал қилишган. Дунё мўжизаларга бой. Мўъжиза ҳам келавермагач, малакали пойтахтдан шифокорларни чақириш лозимлигини айтишди. Шифокорлар келиб текширгандан сўнг, энди ҳаммасини бошидан бошлаш кераклиги айтилди.”
Асқар Исмоилов 7 кундан буён бир маротаба қимирламай, синган суяклар ва нотўғри муолажалар билан игна устида ётган укасининг ҳолатини айтиб, бундай вазиятда шифокорлар амалиётсиз ва ўзига ишонмаган ҳолда беморга таваккалига қараш адолатдан эмаслигини афсус билан баён қилган.
