Тошкентда ерусти метросида туташув содир бўлди (видео)
Воқеа кеча Сергели туманида соат 20:05 да ерусти ҳалқа йўли йўналишининг 6-ва 7-бекатлари оралиғида бўлган.
Тошкент шаҳри Сергели туманидаги ерусти метросида 16 июн куни поездда қисқа туташув содир бўлди. “Тошкент метрополитени” давлат-унитар корхонаси ахборот хизмати ҳолат юзасидан маълумот берди.
Қайд этилишича, соат 20:05 да ерусти ҳалқа йўли йўналишининг 6-ва 7-бекатлари оралиғида жойлашган йўл четидаги тўсин тунукасининг бир қисми атрофдаги кучли шамол сабабли ўз ўрнидан кўчган. Бунинг оқибатида ҳаракатланиб келаётган ҳаракат таркибининг ток қабул қилиш мосламасига теккан ва қисқа туташув содир бўлган.
Шундан сўнг машинист ҳаракат таркибини тўхтатиб, ҳаракатланишга хавф соладиган ҳолатлар йўқлигини текшириб, ўз ҳаракатини давом эттирган. Масъул ходимлар ҳолат юзасидан жойига бориб ўрганиш ишларини олиб борган.
