Айрим суғурта ташкилотларига жарима санкцияси қўлланилди
18 та суғурта ташкилоти ҳисоботларни белгиланган муддатда ва барча меъёрий талаблар доирасида тақдим этган.
Жорий йилнинг I чорак якуни бўйича суғурта ташкилотлари томонидан тақдим этилган ҳисоботларни ўрганиш натижасига кўра, 18 та суғурта ташкилоти ҳисоботларни белгиланган муддатда ва барча меъёрий талаблар доирасида тақдим этган. Бошқа суғурта ташкилотлари томонидан эса меъёрий талабларга амал қилинишда турли даражадаги камчиликларга йўл қўйилган.
13 та суғурта ташкилотига нисбатан ажратилган активлар таркибида ликвид активларнинг етарли даражада шакллантирилмаганлиги, барқарорлаштириш захираларини белгиланган талаблар доирасида ҳисоб-китоб қилинмаганлиги, боғлиқ шахсларнинг устав капиталларида иштирок этиш меъёрлари бузилганлиги, ҳисоботларни белгиланган муддатларда тақдим этилмаганлиги ва бошқа шунга ўхшаш қонун бузилиш ҳолатлари бўйича жами 238 млн сўм миқдорида жарима санкцияси қўлланилди. Бу молиявий ҳисоботларни мониторинг қилиш натижаларига кўра белгиланди.
Ҳисобот даври якуни бўйича 1 та суғурта ташкилотининг тўлов қобилиятини белгиланган талаб даражасига етказиш мақсадида суғурталовчига 15 млрд сўм миқдорида қўшимча капитал киритиш мажбурияти юкланди.
