Андижонда нега ногиронлиги бор шахс автобусга чиқарилмади?
Транспорт вазирлиги ҳолатга муносабат билдирди.
Ижтимоий тармоқларда Андижон шаҳридаги автобус йўналишларида имконияти чекланган фуқароларнинг жамоат транспорти хизматидан фойдаланиш ҳолатини ўрганиш акс этган ижтимоий видеоролик тарқалди.
Унга кўра, йўналишларда фаолият кўрсатаётган автобус ҳайдовчилари турли баҳоналар билан ногиронлиги бўлган шахснинг жамоат транспорти хизматидан фойдаланишини рад этишган.
Ҳолат юзасидан Транспорт вазирлиги матбуот хизмати муносабат билдирди. Вазирлик ушбу ҳолатни янги ишлаётган ҳайдовчиларда кўникма мавжуд эмаслиги билан изоҳлади.
Юқоридаги ҳолат Андижон вилояти Транспорт бошқармаси томонидан назоратга олингани ва махсус ишчи гуруҳи тузилиб йўналишларда ўрганиш ишлари ўтказилгани айтилмоқда. Ўрганиш давомида “Алпомиш Мероси” МЧЖ томонидан йўналишларда фаолият юритаётган барча янги автобусларда пандус (аппарель) ускунаси техник соз ҳолатда эканлиги маълум бўлган.
Шунга қарамай, корхонага ишга янги келган ҳайдовчиларнинг аксариятида ушбу ускунадан тўғри фойдаланиш кўникмалари мавжуд эмаслиги аниқланди.
Юқоридаги ҳолатларни инобатга олган ҳолда жорий йилнинг 22 апрель куни вилоят транспорт бошқармасида йўловчи ташиш фаолияти билан шуғулланувчи корхона раҳбарлари иштирокида йиғилиш ўтказилганди.
Йиғилишда барча тоифадаги йўловчиларга сифатли транспорт хизматлари кўрсатишни ташкил этиш, пандус (аппарель) билан жиҳозланган автобус ҳайдовчиларига зарурат туғилганда ушбу ускунадан тўғри фойдаланган ҳолда йўловчиларга хавфсиз хизмат кўрсатишни йўлга қўйиш юзасидан тегишли кўрсатмалар берилди.
