31 ёшли фуқаро 8-синф ўқувчисига алданди
Бу ҳақда ИИВ Киберхавфсизлик маркази хабар бермоқда.
15 ёшли бола фуқароларни алдаб, пулларини қўлга киритиб, пулларни “PUBG” онлайн ўйинига тикиб келгани аниқланди.
Унга кўра, Фарғона вилоятида яшовчи 1991 йилда туғилган Д.И. ички ишлар органига ариза билан мурожаат қилиб, фирибгар тузоғига тушганлигини ва пулларидан айрилганини айтган.
Маълум бўлишича, ноъмалум шахс телеграм мессенжери орқали унга “Омад шоу” дастурида пул ютуғини ютиб олганлиги тўғрисида хабар юборган. Сўнг унинг ишончига кириб, ютуқ пулларини банк пластик картасига ўтказиб беришини айтган. Ўз навбатида фуқаро унга ўз пластик рақами маълумотларини берган. Лекин ютуқ пулларидан умид қилиб ўтирган Д.И. бироз ўтиб, бор пулидан ҳам айрилган. Пластик картасидаги бир миллион сўмга яқин пуллар ечиб олинган.
