Қамчиқ довонида юк машинаси Дамасга урилиши оқибатида ёнғин келиб чиқди
Ҳодиса оқибатида вафот этганлар бор.
Бугун, 21 июль куни Камчиқ довонида 2 та автомашина иштирокида йўл-транспорт ҳодисаси содир бўлиб, ёнғин келиб чиқди. Ҳолат юзасидан Наманган вилояти Ички ишлар бошқармаси ахборот хизмати дастлабки маълумотларни эълон қилди.
Маълум қилинишича, ҳодиса соат 00:05 атрофида А-373 Тошкент–Ўш автомобиль йўлининг 222-километрида юз берган. Водий–Тошкент йўналиши бўйлаб ҳаракатланиб бораётган “MAN” русумли (давлат рақами 40 Q 486 XA) ёнилғи ташувчи юк машинаси қарама-қарши йўналишга ўтиб кетиб, “Damas” (давлат рақами 40 Q 943 WA) русумли транспорт воситасига бориб урилган. Тўқнашув оқибатида ёнғин келиб чиққан ва транспорт воситалари ёниб зарарланган. Шунингдек, воқеа жойида бўлган “Nexia” автомашинасига ҳам техник шикаст етган.
Ҳодиса оқибатида вафот этганлар бор. Ҳозирда ёнғин асоратларини бартараф этиш бўйича ишлар олиб борилмоқда.
Эслатиб ўтамиз, бундан олдин Қамчиқ довонида пахта толасини ортиб кетаётган юк машинасида ёнғин чиққанди.
Жавоҳирбек ТУРСУНОВ
