Президент Афғонистонга эътибор сусайганини қайд этди
Шавкат Мирзиёев халқаро конференция иштирокчиларига мурожаат йўллади.
Ўзбекистон Республикаси Президенти Шавкат Мирзиёев "Афғонистон: хавфсизлик ва иқтисодий тараққиёт" халқаро конференцияси иштирокчиларига мурожаат йўллади.
Давлат раҳбари минг йиллар давомида ўзбек ва афғон халқлари ўзаро қўшничиликда яшаганини алоҳида қайд этди.
"Бизни умумий маданият, маънавий ва тарихий қадриятлар, умумий дин ва буюк аждодлар мероси бирлаштириб туради. Амударёнинг бошқа қирғоғида барқарорлик ўрнатилмай туриб Ўзбекистон ва бутун Марказий Осиё минтақасида хавфсизлик ва барқарор ривожланишга эришиб бўлмайди", — деган Президент.
Шавкат Мирзиёев бутун дунёда Афғонистонга эътибор пасаяётганини таъкидлаган.
Шу билан бирга Ўзбекистон етакчиси дунё ҳамжамиятини Афғонистон муваққат ҳукуматининг мамлакатни тиклаш борасидаги саъй ҳаракатларини қўллаб қувватлашга чақирган.
