Шимолий Корея коронавирусни тўлиқ енгди
Мамлакатда барча беморлар касалликдан соғайгани маълум қилинди.
Шимолий Корея барча беморлар COVID-19 инфекциясидан соғайганини маълум қилди. Бу ҳақда маҳаллий ОАВларга таяниб, “Корреспондент” нашри хабар қилди.
Қайд этилишича, мамлакатда вирус устидан ғалаба қозонилган. Расмийлар эпидемияга қарши вазият муайян барқарорлик босқичига ўтганини айтмоқда.
“КХДР эпидемияга қарши миллий сиёсат ва чора-тадбирларни амалга оширишда мукаммалликни сақлаш бўйича саъй-ҳаракатларини икки баравар оширади ҳамда эпидемияга қарши тизимни янада кучайтириш бўйича комплекс ишларни амалга оширади”, — дейилади баёнотда.
Бундай ишлар COVID-19 нинг янги турлари устидан мониторингни кучайтириш ва тиббиёт ходимларини тезкор сафарбар этиш чораларини кўришни ўз ичига олади.
Эслатиб ўтамиз, жорий йилнинг май ойида Шимолий Кореяда коронавирус авж олган эди. 4,77 миллионга яқин фуқаро касалликдан азият чеккан.
