Халқаро қидирувдаги бухоролик шахс Туркияда қўлга олинди
У Жиноят кодекснинг 5 та моддаси билан айбланган.
Халқаро ҳамкорликдаги тезкор тадбирда қидирувдаги шахс қўлга олинди, дея хабар бермоқда Ички ишлар вазирлиги ахборот хизмати.
Маълум бўлишича, Бухоро вилоятининг Ромитан тумани “Хоса” маҳалласида рўйхатда туриб яшаган 1977 йилда туғилган Э.Ҳ. Ўзбекистон Республикаси Жиноят кодексининг 155-моддаси 1-қисми, 156-моддаси 3-қисми, 159-моддаси 3-қисми, 244/1-моддаси 3-қисми, 244/2-моддаси 1-қисмида кўрсатилган жиноятларни содир этганликда айбланиб, 2015 йилдан бери туман ИИБ томонидан қидирилаётган бўлган.
Бухоро вилояти ҳуқуқни муҳофаза қилувчи орган ходимларининг ҳамкорликдаги “Қидирув” махсус тезкор профилактик тадбири давомида унинг Туркия ҳудудида яшириниб юрган манзили аниқланган. Шундан сўнг у Туркия ҳуқуқни муҳофаза қилиш органлари ходимлари томонидан ўтказилган махсус операция давомида ушланган ва Ўзбекистон Республикасига экстрадиция қилиниши таъминланиб, тергов ҳибсхонасига жойлаштирилган.
