Тиктокер Ҳаби Леймга Ўзбекистондан совға келди
У шу йил ёзда дунёдаги энг машҳур тиктокерга айланган.
Италиялик машҳур тиктокер Ҳаби Лейм Ўзбекистондан совға олди. Бу ҳақда у ўзининг Инстаграм саҳифасида маълум қилди.
Блогерга Ўзбекистон герби туширилган оқ рангли катта қути юборилган. Унинг ичига олма, узум, помидор ва қалампир каби турли мева-сабзавотлар жойланган. Шунингдек, қутида миллий атласни ҳам кўриш мумкин.
Мазкур совғани ким жўнатгани номаълум. Ҳаби Лейм ўз видеоси якунида «Раҳмат, Ўзбекистон», дея миннатдорчилик билдирган.
Эслатиб ўтамиз, шу йилнинг ёзида Ҳаби Лейм дунёдаги энг машҳур тиктокерга айлангани хабар қилинганди. Ҳозирда унинг 149,1 миллион обуначиси бор.
