Ўзбекистонда ўрмонларни қайта тиклашга қаратилган миллий ҳамда минтақавий лойиҳалар кўриб чиқилди

 

20-21 сентябрь кунлари БМТнинг Европа Иқтисодий Комиссияси ҳамда Озиқ-овқат ва қишлоқ хўжалиги ташкилоти (ФАО)нинг Ўрмон хўжалиги ва ёғоч материаллари қўшма бўлими ЎЗбекистон Республикаси Ўрмон хўжалиги давлат қўмитаси ва ФАОнинг Ўзбекистондаги ваколатхонаси ҳамкорлигида “Ўзбекистонда барқарор ландшафтларни тиклаш учун ўрмон хўжалиги секторини техник-иқтисодий асослаш” мавзусида Миллий мулоқоти ташкил этилди.

 

Мулоқотда Ўрмон хўжалиги давлат қўмитаси, Экология ва атроф-муҳитни муҳофаза қилиш давлат қўмитаси, Ўзбекистон Республикаси Қишлоқ хўжалиги вазирлиги, Сув хўжалиги вазирлиги мутахассислари, нодавлат-нотижорат ташкилотлари, илмий доиралар вакиллари, ФАО экспертлари, БМТнинг Европа Иқтисодий комиссияси ва бошқа халқаро ташкилотлар мутахассислари иштирок этишди. Миллий ва халқаро экспертлар ўрмон соҳасини ривожлантириш учун қулай сиёсий, ҳуқуқий ва институционал асосларни яратиш, Ўзбекистонда ўрмон ландшафтларини тиклашни молиялаштириш механизмлари каби муҳим масалаларни муҳокама қилди. Бундан ташқари, Республикада ўрмонларни қайта тиклашга қаратилган миллий ҳамда минтақавий лойиҳалар кўриб чиқилди.

 

Мулоқот чоғида 2018 йилда ЎЗбекистон ҳукумати Bonn Challenge (Бонн челленж) дастури доирасида 500 минг гектардан ортиқ деградацияга учраган ландшафтларни тиклаш мажбуриятини олгани қайд этилди.

 

Bonn Challenge  — дунё бўйича 2020 йилгача 150 миллион гектар ва 2030 йилга келиб 350 миллион гектар деградацияга учраган ва ўрмонсизланган ерларни тиклаш бўйича глобал саъй-ҳаракатлар мажмуи ҳисобланади. Бугунги кунга қадар 61 та давлат ва 5 та уюшма бу дастурга қўшилган. Шунингдек, Ўзбекистон Кавказ ва Марказий Осиё ландшафтларини тиклаш ва инфратузилмасини кўкаламзорлаштириш бўйича Стратегияни ишлаб чиқишда фаол иштирок этгани алоҳида таъкидланди.

 

Мулоқот иштирокчилари  Шавкат Мирзиёев ташаббуси билан 2021 йилдан буён амалга оширилаётган “Яшил макон” умуммиллий лойиҳаси доирасидаги саъй-ҳаракатларни эътироф этди.