COVID-19 бутунлай йўқ бўлиб кетмайди—эксперт
Мутахассислар фикрича, инсоният короновирус билан яшашга мажбур.
Дунёда коронавирусни юқтириш ҳолатлари 6 фоиз, ўлим кўрсаткичи эса 12 фоизга камайди. Бу ҳақда Соғлиқни сақлаш вазирлиги матбуот хизмати хабар бермоқда.
ЖССТ маълумотларига кўра, ўтган ҳафтада коронавирус яна бир қадам ортга чекинган. Гарчи бу даврда дунё бўйича 2,9 миллиондан ортиқ кишида касаллик аниқланган бўлса-да, кўрсаткичлар 19-25 сентябр саналарига қиёслаганда 6 фоизга камайган.
Қолаверса, ўтказилган таҳлиллар натижасида ўлим ҳолатлари сони 12 фоизга пасайгани маълум бўлган.
Сезиларли камайиш динамикаси Африка (-32 фоиз) ва Ғарбий Тинч океани минтақаси (-22 фоиз) мамлакатларида кузатилган. Европада эса аксинча — 8 фоизлик ўсиш қайд этилди. Ўлим ҳолатларининг пасайиши эса барча минтақаларда рўйхатга олинган.
Ўтган ҳафта ичида энг кўп бемор Германияда аниқланган — 400 мингдан зиёд киши. АҚШда хасталикка чалинганлар сони 312 минг, Японияда 306 минг нафардан ошди. Хитой (303 минг) ва Франсия (қарийб 265 минг) эса навбатдаги ўринларни банд этган.
Юқори ўлим кўрсаткичлари бўйича АҚШ яна олдинда. Бу ерда хасталик туфайли 2728 киши ҳаётдан кўз юмган. Шунингдек, Россияда 711, Японияда 563, Хитойда 368 ва Бразилияда 286 нафар бемор коронавирус қурбонига айланган.
Эксперт Мария ван Керховенинг таъкидлашича, COVID-19 бутунлай йўқ бўлиб кетмайди ва инсоният у билан яшашга мажбур. Ижобий жиҳати эса биз бу хавфли касалликка қарши самарали диагностика ва даволаш усуллари ҳамда ваксиналарга эгамиз.
Керховенинг сўзларига кўра, ҳозир дунёда “омикрон” штаммининг BА.5 субварианти доминант. Хасталикдан асосан эмланмаган аҳоли қатлами азият чекмоқда.
