Самарқандда 43 ёшли аёл ўз жонига қасд қилди
Марҳума 5 нафар фарзанднинг онаси бўлган.
Вилоят прокуратураси хабарига кўра, 2022 йилнинг 3 октябрь кунидан 4 октябрь кунига ўтар кечаси Пастдарғом туманида яшаган 43 ёшли С.С. ота-онаси яшаб келаётган уйнинг ҳовлисидаги дарахтга ўзини осиб, жонига қасд қилган.
Мазкур ҳолат юзасидан Пастдарғом тумани прокуратураси томонидан судга оид тиббий экспертиза тайинланган.
Марҳум С.С.нинг ўз жонига қасд қилгани сабабларини аниқлаш мақсадида унинг турмуш ўртоғи, оила аъзолари, қўни-қўшни ва маҳалладагилардан тушунтириш хатлари олинган, тегишли ташкилотларга сўров хатлари юборилган, хизмат текширувлари тайинланган.
Ҳозирда ҳолат юзасидан туман прокуратураси томонидан терговга қадар текширув ҳаракатлари олиб борилмоқда.
