Мансабдорларнинг одоб-ахлоқ меъёрлари қабул қилинди
Давлат органлари ва бошқа ташкилотлар 25 октябрга қадар ўзини тутиш қоидаларини тасдиқлайди.
Ўзбекистонда мансабдор шахсларнинг одоб-ахлоқ меъёрлари қабул қилинди.
Қайд этилишича, Вазирлар Маҳкамасининг қарори билан Давлат хизматчиларининг намунавий одоб-ахлоқ қоидалари ва Одоб-ахлоқ комиссияси тўғрисидаги намунавий низом тасдиқланган.
Унга кўра, давлат хизматчилари хизмат ва норасмий вақтларида қуйидаги умумий хулқ-атвор қоидаларига риоя қилишлари шарт:
•давлат хизматчисининг обрўсига путур етказадиган ҳаракатлардан ўзини тийиш;
•масъулият ва касбга содиқлик кўрсатиш;
•ҳалолликни кундалик шиорга айлантириш;
•мураккаб вазифаларни бажаришда ҳамкасбларга ёрдам бериш.
Давлат органлари, Вазирлар Кенгашлари, бошқармалар ва бошқа ташкилотлар ўз фаолиятининг ўзига хос хусусиятларини ҳисобга олган ҳолда 25 октябрга қадар ўзини тутиш қоидаларини тасдиқлайди.
