Метрода шубҳали қути ва рюкзак қолдириб кетилди
Унда портловчи қурилма бор-йўқлигини текшириш учун махсус гуруҳ жалб этилган.
Тошкент метросининг Чилонзор йўналиши “Буюк ипак йўли” метро стансиясида Транспорт ва туризм обектларида хавфсизликни таъминлаш департаменти ходими томонидан электропоездда шубҳали қути ва рюкзак қолдириб кетилгани аниқланди.
Қолдириб кетилган буюмлар ўриндиқ ёнидан топилган. Масъул ходим зудлик билан навбатчилик қисмига хабар берган. Рюкзак ва қутида портловчи қурилма бор-йўқлигини текшириш учун ҳодиса жойига ИИВ махсус гуруҳи жалб этилган.
Текширувлар натижасида қолдириб кетилган рюкзак ва қутида портловчи моддалар ҳамда шубҳали буюмлар йўқлиги аниқланган. Орадан 30 дақиқа ўтгач, фуқаро метрополитен ходимига мурожаат қилиб, поезд ичида нарсалари қолиб кетганлигини маълум қилган. Фуқаро билан суҳбат ўтказилиб, далолатнома тузилган ва қолдириб кетилган буюмлар ўз эгасига топширилган.
