Хориж фуқароларига ҚҚС қайтарилади

 

Қарорга мувофиқ, 2023 йил 1 январдан чет давлат фуқароларига улар томонидан Ўзбекистон ҳудудидаги чакана савдо билан шуғулланувчи тадбиркорлардан айрим турдаги товарларни сотиб олишда тўланган ҚҚС суммасини қисман қайтариш “tax free” тизими тажриба тариқасида жорий этилади.

 

Чет давлат фуқароларига қайтариладиган ҚҚС суммасини ҳисобга олиш ва уни қайтариш солиқ органларининг махсус мобил иловаси орқали амалга оширилади.

 

Чет давлат фуқароларига ҚҚС суммасини қайтариш минимал харид қиймати ҚҚС суммасини ҳисобга олган ҳолда камида 1 миллион сўмни ташкил этганда ҳамда товарлар харид қилинган кундан эътиборан 3 ой мобайнида амалга оширилади.

 

2022 йил 10 декабрга қадар мобил иловага чет давлат фуқаролари томонидан тўланган ҚҚС суммасини қайтариш имконини берадиган қўшимчалар киритилади.

 

2022 йил 15 декабргача чет давлат фуқароларининг мобил иловадан рўйхатдан ўтишларида Ўзбекистонга кириб келганлигини қайд этиш маълумотлари орқали идентификация қилиш имконияти яратилади.