Шифокорларга тобора кўпроқ травматолог хизмати керак бўлиб бормоқда

 

Дунёда Яратган томонидан улуғланган иккита касбнинг биринчиси — ўқитувчилик бўлса, иккинчиси — шифокорликдир. Ўз касбига содиқ шифокорлар ҳар куни барчамизга сидқидилдан холис хизмат қилиб, инсонпарварлик намунасига айланиб бормоқда. Шунга қарамай, тиббиёт ходимлари билан боғлиқ нохуш вазиятлар тез-тез учраб турибди. 

 

Уйимизга бизни даволаш учун келган «тез ёрдам»ни 5 минут эртароқ келмадинг деб, калтаклашгача бориш, уларни турли беҳаё сўзлар билан ҳақорат қилиш ва соғлигидан айириш... 

 

Уларни ижтимоий ҳимоялаш баробарида, ҳуқуқий манфаатларини таъминлаш ҳам айни пайтда долзарб вазифа бўлиб қолмоқда. 

 

Маълумотларга қараганда, 2010-2022 йилларда мамлакатимизда 285 дан ортиқ ҳолатда тиббиёт ходимларига нисбатан турли шаклдаги тажовузлар қилинган. Биргина Республика шошилинч тиббий ёрдам илмий маркази ва унинг ҳудудлардаги филиалларида 2018 йил ва 2019 йилнинг ўтган уч ойи давомида 40 дан зиёд тиббиёт ходимларига бемор ва бемор қариндошлари томонидан тан жароҳати етказиш билан боғлиқ ҳолатлар қайд этилган. Уларнинг аксарияти бўйича ҳуқуқ-тартибот органлари томонидан тегишли чоралар кўрилган бўлсада, ҳамон етарли чора кўрилмаган ҳолатлар ҳам мавжуд. 

 

Бироқ амалдаги қонунчиликда хизмат вазифасини бажариб турган тиббиёт ходимларига нисбатан тажовуз қилганлик, тиббий ёрдам кўрсатиш билан боғлиқ фаолиятга тўсқинлик қилганлик учун тўғридан-тўғри жавобгарлик белгиланмаган. Бу эса амалиётда айбдор шахслар Маъмурий жавобгарлик тўғрисидаги кодекснинг турли моддаларига асосан жавобгарликка тортилишига, уларга қилмишга яраша жазо тайинланмай қолишига сабаб бўлмоқда. Олий Мажлис Қонунчилик палатасидаги “Миллий тикланиш” демократик партияси фракцияси йиғилишида депутатлар “Тиббиёт ходимининг фаолиятига тўсқинлик қилганлик учун жавобгарлик белгиланиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун лойиҳасини муҳокама қилдилар.

 

Ушбу қонун лойиҳаси билан эндиликда Маъмурий жавобгарлик тўғрисидаги кодекс янги модда билан тўлдирилиб, унда тиббиёт ходимининг қонуний тиббий фаолиятига тўсқинлик қилиш ёки шу мақсадда тиббиёт ходимига турли шаклда қонунга хилоф равишда таъсир ўтказган фуқароларга 1,5 миллион сўмдан 2,1 миллион сўмгача, мансабдор шахсларга эса 2,1 миллион сўмдан 3 миллион сўмгача жарима ёки 15 суткагача маъмурий қамоқ белгиланмоқда.

 

Хулоса қилиб айтганда, “Саломатлик – туман бойлик”дек неъматимизни асраб-авайлаб келган шифокорларга таҳдид қилиш уларнинг руҳиятига салбий таъсир қилиши билан бир қаторда, ўсиб келаётган авлодни ушбу касбга бўлган қизиқишини ҳам сўндиради.  Куни кеча Шифокорлар куни муносабати билан тиббиёт ходимлари улуғланди, уларнинг шаънига юксак сўзлар битилди. Бироқ бу эҳтиром фақат муайян саналарда эмас, ҳар куни ҳар вақт бўлмоғи лозим. Зеро,“Таълим ал-мутааллим” китобида шундай дейилган: “Табиб ва муааллим етарлича икром қилинмас экан, асло улардан яхшилик кутманг!”. Яъни табиб билан муаллимдан самарали натижа олиш учун уларнинг меҳнатини етарлича қадрлаш даркор.