Мактабларда спорт ривожлантирилади: олимпия спорт турлари бўйича тўгараклар очилади
2027 йилдан спорт мусобақалари ғолибларига диплом ва сертификатлар электрон шаклда берилади.

Ўзбекистондаги умумтаълим муассасаларида ўқувчиларни спортга жалб қилиш мақсадида камида биттадан спорт тўгараги йўлга қўйилади. Бу ҳақда тегишли қарорда белгиланган.
Ҳужжатга кўра, мактабларда спорт клублари ва тўгараклари тармоғи кенгайтирилади, жисмоний тарбия фани ўқитувчилари фаолияти ривожлантирилади.
Шунингдек, спорт мактаблари бириктирилган ҳолда умумтаълим муассасаларида “Мактабдан Спорт академиясигача” тамойили асосида якка кураш ва жамоавий олимпия спорт турлари бўйича камида биттадан тўгарак ташкил этилади.
Қарорга мувофиқ, 2027 йил 1 январдан бошлаб “ERP sport” тизими орқали спорт мусобақалари ғолиблари ва совриндорларига QR-код қўйилган диплом ҳамда сертификатлар электрон шаклда бериш тартиби жорий этилади.
Бундан ташқари, Спорт вазирлиги тизимидаги спорт турлари бўйича Республика олий спорт маҳорати мактаблари негизида Олимпия терма жамоалари маркази ташкил этилади.








