Намангандаги уйда тунда газ портлади
Хонадонда имконияти чекланган фуқаро яшаган.
Бугун, 11 декабрь куни Наманган шаҳридаги хонадонлардан бирида ёнғин чиқди. Ҳолат юзасидан вилоят ФВБ маълумот берди.
Қайд этилишича, соат 01:13 да Наманган шаҳри “Диёр” МФЙ ҳудудида жойлашган хонадонларнинг бирида ёнғин содир бўлаётганлиги ҳақида ФВБга хабар келиб тушган. Шунга кўра, 1,3-сонли ёнғин қутқарув қисмининг экипажлари воқеа жойига юборилган, ёнғин қутқарувчилар томонидан соат 01:45 да тўлиқ бартараф этилган.
Ҳодиса оқибатида хонадон эгаси — 1952 йилда туғилган фуқаро 65 фоиз, унинг ўғли — 1980 йилда туғилган 2-гуруҳ ногирони 95 фоиз (ўта оғир даражада) куйиб, тан жароҳати олган. Яшаш уйининг шифт ва том қисмидан 70 квадрат метр жойи ҳамда уй-рўзғор буюмлари ёниб зарарланган.
Ёнғин газ ва ҳаво аралашмасининг чақнаши натижасида содир бўлган деб тахмин қилинмоқда. Хонадон эгаси билан суҳбатлашилганда уйни иситиш мақсадида қўлда ясалган туника печига газ сўрғич ўрнатилганини баён этган.
Ҳозирда терговга қадар суруштирув ишлари олиб борилмоқда.
