Орадан ўн кун ўтиб "Илҳом" театрида рўй берган ёнғин сабаби маълум бўлди
Суғурта компанияси ёниб кетган биноларни таъмирлаш учун театрга маблағ ажратди.
Тошкентдаги "Илҳом" театрида рўй берган ёнғинга электр симларида юзага келган қисқа туташув сабаб бўлган. Бу ҳақда театр матбуот хизмати хабар берди.
"Илҳом театрида юз берган ёнғин бўйича Ўзбекистон ёнғин хавфсизлиги бошқармаси томонидан дастлабки экспертиза ўтказилди. Ёнғин сабаби: электр симларининг эскирганлиги сабабли қисқа туташув содир бўлган", — дейилади хабарда.
Ҳозирда театр ходимлари шикастланган кўргазма залини тартибга келтирмоқда, тез орада ёниб кетган биноларни таъмирлаш ишлари бошланади.
Қайд этилишича, Gross лойиҳасининг суғурта жамоаси таъмирлаш учун маблағ ажратди.
Эслатиб ўтамиз, 12 декабрь куни “Илҳом” театри биносида ёнғин юз берган эди.Ёнғин натижасида театр биносининг 1-қават холида 80 кв. м. майдон ички қисми ва жиҳозлари ёниб зарарланган. Тезкор ҳаракатлар сабабли бинонинг 600 кв.м. майдони сақлаб қолинган.
Маълумот учун: “Илҳом” театри кўргазмалар залида содир бўлган ёнғин туфайли спектакллар тергов якунига қадар тўхтатилди. Олдин сотиб олинган барча чипталар театр қайта очилгунча ўз кучини йўқотмайди.
