Наманганда 25 ёшли қиз ёниб кетиб, вафот этди
Ҳодиса бугун эрталаб содир бўлган.
Бугун, 31 декабрь куни Наманган шаҳрида хонадонларнинг бирида ёнғин юз берди. Ҳолат юзасидан вилоят Фавқулодда вазиятлар бошқармаси маълумот берди.
Қайд этилишича, соат 07:21 да ФВБ 101 қисқа рақамига Наманган шаҳрининг “Байналминал” МФЙ ҳудудидаги хонадонда ёнғин содир бўлаётгани ҳақида хабар келиб тушган. Шунга асосан, соат 07:25 да ёнғин қутқарув экипажи воқеа жойига етиб борган, содир бўлган ёнғин соат 07: 40 да тўлиқ бартараф этилган.
Ёнғин вақтида хонадон эгасининг қизи — 1 гуруҳ ногирони 1997 йилда туғилган фуқаронинг куйган ҳолдаги жасади топилган. Шунингдек, бинонинг шифт ва том қисмидан 25 квадрат метр жойи ҳамда уй жиҳозлари ёниб зарарланган.
Ҳозирда содир бўлган ёнғин юзасидан терговга қадар суриштирув ишлари олиб борилмоқда.
