Наманганда салкам 6 тонналик ош тайёрланди
У кам таъминланган ва эҳтиёжманд оилаларга тарқатилган.
Намангандаги “Афсоналар водийси” тематик паркида Янги йил байрами арафасида 5,8 тонна ош дамланди. Бу ҳақда вилоят ҳокимлиги хабар бермоқда.
Ошни тайёрлаш учун 15 га яқин малакали ошпазлар жалб қилиниб, 1,5 тонна гуруч ишлатилган.
Эҳсон оши шифохоналарга, “Саховат”, “Меҳрибонлик” ва ногиронлик уйларига, шунингдек, кам таъминланган ҳамда эҳтиёжманд оилаларга тарқатилган.
“Байрам ошини тортиқ қилиш олдидан вилоят сектор раҳбарлари, нуроний кексалар дуо-фотиҳа қилдилар, ундан махсус идишларга солиниб, белгиланган автоуловларда манзилларига етказилди”, — дейилади хабарда.
