Тожикистонлик фуқаро Ўзбекистонга гиёҳванд модда олиб кирмоқчи бўлди
У наркотикни бош кийимига яширган.
Наманган вилоятининг Поп туманидаги чегара постида бош кийими орқали гиёҳванд модда олиб киришга уринган шахс қўлга олинди. Бу ҳақда вилоят ИИБ ахборот хизмати хабар берди.
Қайд этилишича, “Поп” чегара божхона постида пиёда ҳаракатланаётган Тожикистон фуқароси Б.Д. божхона назоратидан ўтказилган.
Натижада унинг бош кийими ичида қора рангли полиэтилен пакетчаларга ўралган тўрт бўлак овалсимон шаклдаги, тўқ жигарранг рангли, ўткир ҳидли гиёҳванд моддага ўхшаш модда борлиги аниқланган. Шундан сўнг текшириб кўришлик учун вақтинча сақловга олинган.
Эксперт хулосасига кўра, ашёвий далил сифатида олинган тўрт бўлак модда “гашиш” гиёҳвандлик моддаси бўлиб, унинг соф оғирлиги 16,07 граммга тенг экани маълум қилинган.
Ҳозирда ҳолат юзасидан жиноят иши қўзғатилиб, тергов ҳаракатлари олиб борилмоқда.
