Ҳокимлар қўлига ўтиб бораётган таълим
Ёхуд мактабларда дарслар онлайн бўлишини ким ҳал қиляпти?
Ўзбекистонда бошланган ва ҳалигача давом этаётган аномал совуқ сабаб республикадаги таълим муассасаларида қишки таътил узайтирилганди. Хусусан, мактабларда таътил 28 декабрдан бошланиб, 10 январда тугаши керак эди. Об-ҳавонинг кескин совиб кетиши ортидан ўқувчиларнинг дам олиш кунлари аввалига 17 январгача, кейинроқ 22 январга қадар давом этадиган бўлди.
Ва ниҳоят 23 январдан республикадаги барча мактабларда III чорак дарслари бошланди. 22 январь куни вазирлик иссиқлик таъминотида муаммоси бўлган мактаблар ўқишни вақтинча масофадан олиб боришларига рухсат берди. Шундан келиб чиқиб, жами 717 та мактабда ўқув машғулотлари масофавий шаклда ташкил этилган.
Шу ўринда савол туғилади: дарсларнинг онлайн ёки офлайн бўлишини ким ҳал қилмоқда? Вазирлик ва унинг ҳудудий бошқармаларими ёки маҳаллий ҳокимликлар?
Zamon.uz кузатувига кўра, Тошкентдаги мактабларнинг 57 тасида таълим онлайн шаклда олиб борилиши шаҳар ХТББ расмий телеграм каналида 22 январь куни соат 20:40 да эълон қилинган. Чилонзор туман ҳокимлиги эса ўз ҳудудидаги қайси мактабларда дарслар онлайн бўлишини ўша куни соат 18:17 да маълум қилиб улгурганди.
Андижонда бироз бошқача ҳолат: вилоят ҳокимлиги расмий телеграм каналида бу бўйича ҳеч қандай маълумот эълон қилмаган. Лекин Халқ таълими бошқармаси ҳали онлайн таълимга рухсат берилмасидан аввал (20 январь) вилоятдаги 16 та мактабда дарс машғулотлари масофавий тарзда олиб борилишини билдирган.
Наманган вилоятидаги айрим мактабларда дарсларнинг онлайн ташкил этилишига вазирлик бунга рухсат беришидан 5 кун олдин қарор қилинган. 16 январь куни вилоят ҳокимлигида бу бўйича йиғилиш ўтказилган ва худди шу куни Халқ таълими бошлиғининг ҳам 14-сонли буйруғи чиққан. Жамоатчилик эса бундан дарслар бошланишидан бир кун олдин хабар топган.
Қашқадарё вилояти расмийлари дарслар онлайн ўтиладиган мактаблар рўйхатини бир кун кечикиб эълон қилган. Бу ҳақдаги хабар эса дастлаб ҳокимлик матбуот хизмати томонидан, кейинроқ вилоят ХТБ томонидан очиқланган.
Эслатиб ўтамиз, 10 январь куни қишки таътил даврини узайтириш ваколати ҳудуддаги об-ҳаво шароитларини инобатга олган ҳолда маҳаллий ҳокимликларга ўтказилганди.
Вазирлар Маҳкамасининг тегишли баёнига асосан Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларига мактабгача, умумтаълим, ўрта махсус, профессионал ҳамда олий таълим ташкилотларида қишки таътил даврини узайтириш ёки узайтирмаслик ваколати берилган.
Вазирлик тақдим этган мазкур хабарда бу ваколат қачонгача амал қилиши аниқ ёзилмаган. Шунингдек, ҳокимликлар томонидан дарсларни онлайн ташкил этишга рухсат берилиши мумкинлиги ҳам айтилмаган.
Zamon.uz таътил узайтирилиши билан боғлиқ ноаниқликлар, маҳаллий ҳокимликларга таълим соҳасида берилган ваколатлар юзасидан Мактабгача ва мактаб таълими вазирлиги матбуот котиби билан телефон орқали боғланди, лекин аниқ жавоб ололмади.
“Кейинги йили нима бўлишини олдиндан билмаймиз”, — дея қисқа жавоб берди Л. Рустамова.
Бу бўйича расмийлардан қўшимча маълумот ва изоҳ кутиб қоламиз.
