Ўзбекистонда ҳам кучли ер силкиниши бўладими?
Бу ҳақда ФВВ маълумот берди.
Аввалроқ Туркияда кучли зилзила рўй бергани хабар қилинганди. Мазкур зилзила аҳоли ўртасида турли саросималар юзага келишига сабаб бўлмоқда.
Ўзбекистон Фавқулодда вазиятлар вазирлиги мамлакат ҳудудида кучли ер силкини рўй бериши ёки бермаслиги ҳақида маълумот берди.
Қайд этилишича, Туркия ҳудуди сейсмик фаол зонада жойлашган бўлиб, зилзилалар айнан мазкур сейсмоген зоналарда содир бўлмоқда.
Бугунги кунда республикада Фавқулодда вазиятлар вазирлиги ҳамда Фанлар академияси ҳамкорлигида Сейсмик вазиятни баҳолаш ва келгусидаги сейсмик вазиятни прогноз қилиш бўйича Идоралараро эксперт комиссияси фаолият юритади. Мазкур Идоралараро эксперт комиссияси ҳар ҳафта бўйича Республика ва унга чегарадош ҳудудларда зилзила содир бўлиш эҳтимоллигини комплекс-прогностик кузатув натижаларига асосан баҳолайди.
Ҳозирги кунда зилзилаларни прогноз қилиш соҳасида сейсмометрик, геофизик, магнитометрик ва гидрогеосейсмологик кузатувлар олиб борилади.
Олинган кузатув маълумотлари натижаларига асосан Идоралараро эксперт комиссиясининг 2023 йил 3 февралдаги 5-сонли баёни хулосасига кўра, Ўзбекистон ва унга чегарадош ҳудудларда магнитудаси М≥5 бўлган зилзилалар даракчилари аниқланмаган ҳамда кучли зилзилалар содир бўлиш эҳтимоли мавжуд эмас.
