Террористик ташкилот ҳудудини қўриқлаган наманганлик йигит 9 йилга “кесилди”
У ташкилот собиқ етакчисининг маърузаларини мунтазам тинглаб келган.
Сурияда террористик ташкилот жойлашган ҳудудни қўриқлаган наманганлик 24 ёшли йигит озодликдан маҳрум қилинди. Бу ҳақда “Янги Ўзбекистон” нашри хабар берди.
Қайд этилишича, йигит 2020 йилнинг сентябрь ойида мавсумий ишлаш мақсадида Туркиянинг Истанбул шаҳрига борган. Тикувчилик цехида ишлаши даврида интернет орқали “Тавҳид ва жиҳод катибаси” террористик ташкилоти собиқ етакчиси “Абу Салоҳ”нинг маърузаларини мунтазам тинглаган ва унда экстремистик қарашлар шаклланган.
Сўнгра “Тавҳид ва жиҳод катибаси” жангарилари сафига қўшилиш мақсадида интернет орқали мазкур ташкилотнинг 2 нафар аъзоси билан танишиб, уларнинг йўл-йўриқлари асосида 2021 йилнинг январь ойида Сурия давлатига ўтган.
У ерда ҳарбий тайёргарликдан ўтиб, “Тавҳид ва жиҳод катибаси” террористик ташкилоти жойлашган ҳудудни қўриқлаш билан шуғулланган.
Терроризмга қарши курашиш доирасида ушбу шахс 2022 йилнинг июнь ойида у Ўзбекистонга олиб келинган ҳамда Давлат хавфсизлик хизматининг Тергов бошқармаси томонидан унга нисбатан жиноят иши қўзғатилган.
Жиноят ишлари бўйича Тўрақўрғон туман судининг ҳукмига асосан мазкур фуқаро Жиноят Кодексининг 155-2 моддасининг 1-қисми ва 244-2 моддасининг 1-қисми билан айбдор деб топилиб, унга 9 йил муддатга озодликдан маҳрум қилиш жазоси тайинланган.
